ആകെ മൊത്തം വ്യാജന്മാർ 😆😅😆

കഴിഞ്ഞ ദിവസങ്ങളിൽ വ്യാജ ചികിത്സകർ എന്ന പേരിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നായി , പ്രത്യേകിച്ച് തൃശൂർ ജില്ലയിൽനിന്നും നിരവധി പാരമ്പര്യ വൈദ്യന്മാരെയും നാട്ടുവൈദ്യന്മാരെയും സുപ്രീം കോടതിയുടെ ഒരു വിധിയുടെ അടിസ്ഥാനത്തിൽ ജാമ്യമില്ലാ വകുപ്പുകൾ ചുമത്തി അറസ്റ്റു ചെയ്തു ജയിലിൽ അടച്ചതായി അറിയാൻ കഴിഞ്ഞു . മതിയായ അംഗീകൃത സർട്ടിഫിക്കറ്റുകൾ ഇല്ലാതെ ചികിത്സ നടത്തി എന്നതായിരുന്നു ഇവരുടെ പേരിലുള്ള കുറ്റം എന്നാണു അറിയാൻ കഴിഞ്ഞത് .. എന്തായാലും നല്ല കാര്യം . ആരെങ്കിലും സമൂഹത്തിൽ വ്യാജ ചികിത്സ നടത്തുന്നുണ്ടെങ്കിൽ അവർ വ്യാജന്മാരാണെങ്കിൽ 

അവരെ അറസ്റ് ചെയ്യുക തന്നെ വേണം . 

ഇത്തരക്കാരെ അറസ്റ്റ് ചെയ്ത വാർത്ത കേട്ടപ്പോൾ സമൂഹത്തിൽ നിലനിൽക്കുന്ന കുറച്ചു വ്യാജന്മാരെക്കൂടി സർക്കാരിന്റെ ശ്രദ്ധയിൽ പെടുത്തുകയാണ്‌.  പ്രത്യേകിച്ച് മിക്ക വീടുകളിലെയും അമ്മമാർ . ഹോം സയൻസും ഫുഡ് ടെക്നോളജിയും ഹോട്ടൽമാനേജ്മെന്റും ഒന്നും പഠിക്കാത്ത അമ്മമാരാണ് മിക്ക വീടുകളിലും ഭക്ഷണം ഉണ്ടാക്കുന്നത് . ഇതൊക്കെ എങ്ങനെ വിശ്വസിച്ചു കഴിക്കും ..? അതുപോലെ തന്നെ വീട്ടിൽ കുട്ടികൾക്ക് ജലദോഷവും പനിയും ഒക്കെ വരുമ്പോൾ ഇവർ ചുക്കുകാപ്പിപോലുള്ള വ്യാജ മരുന്നുകൾ ഉണ്ടാക്കി കൊടുക്കുന്നതായും

കാണുന്നു . പാവം കുട്ടികളുടെ ആരോഗ്യം വെച്ചാണോ ഈ അമ്മമാർ പന്താടുന്നത് ? . കോടികൾ കൈക്കൂലി കൊടുത്തു മെഡിക്കൽ ബിരുദം നേടിയ ആയിരക്കണക്കിന് ഡോക്ടർമാർ ഇവിടെ തൊഴിലില്ലാതെ നടക്കുമ്പോഴാണ് അമ്മമാർ ഇത്തരം വ്യാജ ചിലിത്സകൾ നടത്തുന്നത് എന്ന് നാം ഓർക്കേണ്ടതുണ്ട് . അതുപോലെ ഹോട്ടൽ മാനേജ്മെന്റും ഫുഡ് ടെക്നോളജിയും കഴിഞ്ഞ നിരവധിചെറുപ്പക്കാർ ഇവിടെ ഉള്ളപ്പോഴാണ് ഇതിനെക്കുറിച്ചൊന്നും ഒരു സർട്ടിഫിക്കറ്റും ഇല്ലാത്ത അമ്മമാർ ഇവിടെ വീടുകളിൽ ഭക്ഷണം ഉണ്ടാക്കി മക്കൾക്കും മറ്റുള്ളവർക്കും നൽകുന്നത് . ഇതിനൊക്കെ വീടുകളിൽ ഒരു റൈഡോക്കെ നടത്തി ഇത്തരം അമ്മമാരെ അറസ്റ്റ് ചെയ്തു നിയമത്തിന് മുൻപിൽ കൊണ്ടുവരണമെന്നാണ് എന്റെ ഒരു അപേക്ഷ . ഫ്യുറഡാൻ , എൻഡോസൾഫാൻ തുടങ്ങിയ 

ധാരാളം വിഷമൊക്കെ അടിച്ചു അണുവിമുക്തമാക്കിയ അരിയും

പച്ചക്കറികളും ഒക്കെ ഉപയോഗിക്കുന്നതുകൊണ്ട് മാത്രമാണ് നമ്മളൊന്നും വലിയ കുഴപ്പമില്ലാതെ ഇപ്പോഴും ജീവിച്ചിരിക്കുന്നത് എന്നതാണ് എന്റെ ഒരു ഇത് ..

ഇനി സമൂഹത്തിലെ മറ്റു ചില വ്യാജന്മാരെക്കൂടി പരിചയപ്പെടുത്താം . സിവിൽ എഞ്ചിനീയറിംഗ് ഡിപ്ലോമ ഇല്ലാത്ത, പത്താം ക്ലാസ്സുപോലും പാസ്സാകാത്ത പല ആളുകളും  കെട്ടുപണിക്കും , ഇലെക്ട്രിക്കൽ എഞ്ചിനീയറിംഗ് പഠിക്കാത്ത പലരും വയറിങ് പണിക്കും പോകുന്നതായും അറിയാൻ കഴിഞ്ഞു. ഇത്തരക്കാരൊക്കെ പണിയുന്ന കെട്ടിടങ്ങളാണ് എല്ലാം തന്നെ. മതിയായ ഒരു യോഗ്യതയും ഇല്ലാത്ത ബംഗാളികൾ വരെ ഈ രംഗത്ത് പണിയെടുക്കുന്നു ..  ഇത്തരക്കാർ പണിയുന്ന കെട്ടിടങ്ങളിലൊക്കെ എങ്ങനെ വിശ്വസിച്ചു താമസിക്കും .? 

അതുപോലെ മെക്കാനിക്കൽ എഞ്ചിനീയറിംഗ് പഠിക്കാത്ത പലരും വർക്ഷോപ്പുകൾ നടത്തുകയും അവിടെ പണി എടുക്കുകയും ചെയ്യുന്നുണ്ട് . ഇവർ റിപ്പയർ ചെയ്യുന്ന വാഹനങ്ങളിൽ എങ്ങനെ വിശ്വസിച്ചു യാത്ര ചെയ്യും .? 

അതുപോലെ ബ്യുറ്റീഷ്യൻ ഡിപ്ലോമ കഴിഞ്ഞ നിരവധി ചെറുപ്പക്കാർ ഇവിടെ തൊഴിലില്ലാതെ നടക്കുമ്പോൾ ചില ആളുകൾ പാരമ്പര്യ തൊഴിൽ എന്ന പേരിൽ ബാർബർ ഷോപ്പുകൾ നടത്തുന്നതായും കണ്ടു വരുന്നു ....

കഴിഞ്ഞ ദിവസം ഏകദേശം എഴുപതു വയസ്സ് തോന്നിക്കുന്ന ഒരു വൃദ്ധൻ കാളയെവെച്ചു നിലം ഉഴുന്നതു കണ്ടു. എന്തുചെയ്യുകയാണെന്നു ചോദിച്ചപ്പോൾ  നെല്ല് കൃഷി ചെയ്യാനാണെന്നാണ്‌ പറഞ്ഞത് . പാരമ്പര്യമായി നെൽകൃഷി ചെയ്തുവരുന്നവരാണെന്നും പറഞ്ഞു . കാർഷിക സർവ്വകാല ശാല ബിരുദമോ ഡിപ്ലോമയോ ഉണ്ടോ എന്ന് ചോദിച്ചപ്പോൾ അങ്ങനെ ഒന്ന് കേട്ടിട്ടുപോലും ഇല്ല പോലും ....!!! ഇത്തരക്കാർ ഒക്കെ കൃഷി ചെയ്യുന്ന അരിയും പച്ചക്കറിയും ഒക്കെ ആണല്ലോ ദിവസവും നമ്മൾ കഴിക്കുന്നത് എന്നോർത്തപ്പോൾ ശരിക്കും ഭയപ്പെട്ടുപോയി ..!!

ഏതുമേഖലയിൽ നോക്കിയാലും സർവ്വത്ര വ്യാജമയം ...!!!

അതുകൊണ്ടു വ്യാജ വൈദ്യന്മാരെന്ന പേരിൽ പാരമ്പര്യ വൈദ്യവും നാട്ടുവൈദ്യവും ചെയ്യുന്നവർക്കെതിരെ ഇപ്പോൾ എടിത്തിരിക്കുന്ന നടപടികൾ മേൽപ്പറഞ്ഞ വ്യാജന്മാർക്കെതിരെ കൂടി എടുക്കണമെന്ന്  വിനീതമായി അപേക്ഷിക്കുന്നു .

ആകെ ഒരു ആശ്വാസം ഉള്ളത് നമ്മളെ ഭരിക്കുന്ന പഞ്ചായത്ത് മെമ്പർ മുതൽ എം എൽ എ , എം പി , കേന്ദ്ര സംസ്ഥാന മന്ത്രിമാർ തുടങ്ങിയവർ എല്ലാം തന്നെ രാഷ്ട്ര തന്ത്രത്തിൽ ബിരുദവും ബിരുദാനന്ദ ബിരുദവും ഒക്കെ ഉള്ളവരും 

ഇന്ത്യൻ സിവിൽ സർവീസ് പരീക്ഷ വരെ പാസ്സായവരും ആണല്ലോ എന്നുള്ളതാണ് ...🙏

✍️ജേക്കബ് വടക്കാഞ്ചേരി

********************"*****"*******

SAMAR Acupuncture and Hijama Center

Kurukathani

9387762313 - 9142055890