ജുമുഅക്ക് സന്നിഹിതനാകുന്നവന്‍ ഏറ്റവും നല്ല വസ്ത്രം ധരിച്ച് ഭംഗിയാവുക, തലപ്പാവ് ധരിക്കുക, സുഗന്ധ ദ്രവ്യം ഉപയോഗിക്കുക, കൈകാലുകളുടെ നഖം മുറിക്കുക, നീക്കല്‍ സുന്നത്തുള്ള മുടികള്‍ നീക്കുക എന്നിവ സുന്നതാണ്.
വെള്ളിയാഴ്ചയാണെങ്കിലും അല്ലെങ്കിലും വെള്ള വസ്ത്രമാണ് നല്ലത്. പെരുന്നാളില്‍ പരിഗണിക്കേണ്ടത് ഏറ്റവും വില കൂടുതലുള്ള വസ്ത്രമാണ്. അപ്പോള്‍ പെരുന്നാളും ജുമുഅയും ഒത്തുവന്നാല്‍ പെരുന്നാളിനെ മാനിക്കണം. (തുഹ്ഫ: ശര്‍വാനി 2/475, ബാജൂരി 1/327)
വെളുത്ത വസ്ത്രമല്ലാത്തവ ധരിക്കല്‍ കറാഹത്തില്ല. എങ്കിലും പതിവായി കറുത്തത് ധരിക്കല്‍ നല്ലതല്ല. (ജമല്‍: 2/47) ബറകത്തുള്ള വസ്ത്രം കറുപ്പുനിറമാണെങ്കിലും ശൈഖ് മുരീദിന് നല്‍കുന്ന വസ്ത്രം കറുപ്പാണെങ്കിലും അവര്‍ക്കതു ഉത്തമമാണെന്ന് പറയേണ്ടതില്ലല്ലോ.
എപ്പോഴും കറുത്ത ചെരിപ്പ് ധരിക്കല്‍ നല്ലതല്ല. (ജമല്‍ 2/47) സൂപ്പര്‍വൈറ്റ് പോലുള്ള ചായം മുക്കിയ വസ്ത്രം ധരിക്കല്‍ കറാഹത്തില്ലെന്നാണ് പ്രബല വീക്ഷണം. എന്നാല്‍ കുങ്കുമം, ചെന്താമര എന്നിവ കൊണ്ടുചായം മുക്കിയത് കറാഹത്താണ്. (തുഹ്ഫ, ശര്‍വാനി 2/475, തര്‍ശീഹ് പേജ് 121 നോക്കുക.)
കൈനഖം മുറിക്കേണ്ടത് വലതു കയ്യിന്റെ ചൂണ്ടുവിരല്‍ കൊണ്ട് തുടങ്ങി ക്രമപ്രകാരം ചെറുവിരല്‍ വരെയും പിന്നെ തള്ളവിരലും അനന്തരം ഇടതുകയ്യിന്റെ ചെറുവിരല്‍ മുതല്‍ അതിന്റെ തള്ള വിരല്‍ വരെയും എന്ന ക്രമത്തിലാണ്. കാല്‍നഖം മുറിക്കേണ്ടത് വലതു കാലിന്റെ ചെറുവിരല്‍ കൊണ്ട് തുടങ്ങി ഇടതുകാലിന്റെ ചെറുവിരല്‍ കൊണ്ട് അവസാനിപ്പിക്കുന്ന വിധത്തിലുമാണ്. (തുഹ്ഫ 2/476)
നഖം വെട്ടിയ ഭാഗം വേഗം കഴുകേണ്ടതാണ്. കഴുകുന്നതിന് മുമ്പ് അവിടം കൊണ്ട് ചൊറിഞ്ഞാല്‍ പാണ്ഡ് രോഗം പിടിപെടാന്‍ സാധ്യതയുണ്ട്. (തുഹ്ഫ 2/476) നഖം വെട്ടിയ ശേഷം വിരലുകളുടെ തലകള്‍ കഴുകല്‍ സുന്നത്താണ്. (ബാജൂരി 1/328)
വ്യാഴം, വെള്ളിയാഴ്ച പകല്‍, തിങ്കളാഴ്ച പകല്‍ എന്നീ ദിവസങ്ങളില്‍ നഖം വെട്ടല്‍ വളരെ നല്ലതാണ്. (തുഹ്ഫ 2/476, ജമല്‍ 2/47)
രാത്രി നഖം വെട്ടല്‍ കറാഹത്തില്ല. അതു അപലക്ഷണവും അല്ല. നഖം കുഴിച്ചുമൂടലാണ് സുന്നത്ത്. (നിഹായ 2/341)
വൂളൂ ഉള്ളവന്‍ നഖം മുറിച്ചാല്‍ വുളൂ പുതുക്കല്‍ സുന്നത്തുണ്ട്. (ബുഷ്‌റല്‍ കരീം 2/10) രണ്ടു കയ്യില്‍ ഒന്നിന്റെയോ രണ്ടു കാലില്‍ ഒന്നിന്റെയോ മാത്രം നഖം നീക്കല്‍ കറാഹത്താണ്. രണ്ട് കയ്യിന്റെയും നഖം മുറിക്കുക, കാലിലെ നഖം മുറിക്കാതിരിക്കുക, അല്ലെങ്കില്‍ രണ്ടു കാലിലെയും നഖം മുറിക്കുക, കയ്യിന്റെ നഖം മുറിക്കാതിരിക്കുക എന്ന രീതി കറാഹത്തില്ല. (തുഹ്ഫ : ശര്‍വാനി 2/475)
ചുണ്ടിന്റെ ചുകപ്പ് വെളിവാകും വിധത്തില്‍ മീശ വെട്ടല്‍ സുന്നതാണ്. മീശ പൂര്‍ണമായി വടിച്ചുകളയല്‍ കറാഹത്താണ്. (തുഹ്ഫ 2/476) തലമുടി കളയല്‍ നിരുപാധികം സുന്നത്തില്ല. എന്നാല്‍ കളയാധിരിക്കല്‍ കൊണ്ട് ബുദ്ധിമുട്ടുണ്ടാവുകയോ മുടി പരിപാലിച്ചു നിര്‍ത്താന്‍ പ്രയാസകരമാവുകയോ ചെയ്താല്‍ കളയല്‍ സുന്നത്താണ്.
അതുപോലെ ഹജ്ജ്-ഉംറ, ഇസ്‌ലാം മതം സ്വീകരിക്കുക എന്നിവയുമായി ബന്ധപ്പെട്ടു തലമുടി കളയല്‍ സുന്നത്താണ്. പ്രസവിക്കപ്പെട്ട കുഞ്ഞിന്റെ മുടി കളയലും സുന്നത്താണ്. മുടി കളയാതിരിക്കല്‍ മോശമായി കണക്കാക്കപ്പെടുന്ന വേളയിലും കളയല്‍ സുന്നത്തുണ്ട്. (അലിയ്യുശബ്‌റാ മല്ലിസി (2/342)
_____________________________
വിജ്ഞാനം പകര്‍ന്നു നല്‍കല്‍ ഒരു സ്വദഖയാണ് അത് കൈമാറുന്തോറും പുണ്യം വർദ്ധിചുകൊണ്ടിരിക്കും ഈ വിജ്ഞാനം നിങ്ങളുടെ സുഹൃത്തുക്കള്‍ക്ക്കൂടി ഷെയര്‍ ചെയ്യാന്‍ മറക്കരുത്. നാഥന്‍ തൌഫീഖ് നല്‍കട്ടെ - ആമീന്‍
